Misis gi-hostage sa iyang bana

Sinulat ni ARJAY S. FELICILDA

ANG mi-unay pag-hostage sa iyahang asawa nga si Marife, Sabado sa gabii, mao si Jay Aquno Plaza.

Sumala ni P/Supt. Martin Mercado Gamba, regional info officer sa PNP Caraga, ang hostage drama nahitabo sulod mismo sa balay sa magti-agon sa Purok-7 Silangan, Bading dakbayan sa Butuan.

Ang hitabo unang gipadangat sa usa ka concerned citizen ngadto sa Patrol 117 nga mipabalo gilayon sa Butuan City Police Station 3.

Matud ni P/Supt. Gamba nga sayo pa niana, nag-away ang magtiayon kay gikasohan ni misis ang iyahang mister nga kanunay nagapasakit kaniya. Buhat nga supak sa Republic Act 9262 o balaod batok sa violence against women and children (VAWC).

Sa kainit sa ilang panag-away, gibira ni Jay ang iyahang asawa pasulod sa ilang balay diin iyang gi-hostage sulod sa kapin usa ka oras.

Unang miresponde ang mobile patrol nila ni PO2 Sarong. Pagdangat sa ubang ginsakpan sa Butuan City Police Office (BCPO), giliyokan dayon ang balay sa magtiayong Plaza ug gimugna ang hostage committee, pinangulohan ni Police Inspector LucianoTumala.

Sakop sa hostage committee si Kagawad Desiderio Yobac, chair sa peace and order committee sa barangay Bading, ingon man usab ang BCPO SWAT Team.
Gipahigayon ang negosasyon uban sa hostage-taker ug wala nadugay, siya nalukmay ug gibuhi-an ang iyahang asawa nga si Marife.

Mitabang sa negosasyon ang ilahang uyoan nga si Mr Celso Plaza. Si Jay gitanggong sa kapulisan sa Butuan samtang giandam ang kaso batok kaniya. (Arjay S. Felicilda, Caraga Bureau Chief)