24 suba mo-awas, mobaha

BUTUAN City––Mga Caraganon gipaandam batok sa posibleng pag-awas  sa 24 ka kasubaan ug pagdahili sa yuta.Sumala sa pahibalo sa PIA-13, gibanabana nga mohapak sa kinadak-ang bahin sa Caraga Region ang intertropical convergence zone (ITCZ) sa mosunod nga 24 ka mga takna.
Tungod niini, posibleng mo-awas ang kasubaan sa Mainit-Tubay, Asiga ug Agusan (Agusan Norte); Ojot, Wawa, Andanan, Libang, Mosam, Kasilan, Gibon, Adgaoan, Simulao, Kayonan ug Haoan (Agusan Sur); Anaoaon, Magallanes ug Surigao (Surigao Norte); ug Cantilla, Toracan, Tandag, Tago, Hobo-Oteiza, Hinatuan ug Bislig (Surigao del Sur).

Ang Caraga Regional Disaster Risk Reduction Management Council (RDRRMC), pinaagi sa Office of Civil Defence (OCD-13), mipalanog na sa General Flood Advisory No. 1 aron makaandam, ilabi ang mga nanimuyo dool sa nasangpit nga kasubaan.

“Dili kita moundang pag-ampo nga wala gayoy maangin nga kinabuhi,” panawagan sa RDRRMC.

Sa pikas bahin, gisuhid karon sa mga otoridad ang kinatibok-ang dakbayan sa Surigao ug silingang mga dapit human mitay-og ang magnitude 3.8 nga linog kaniadtong udto sa Biyernes.

Matud sa Phivolcs, tectonic ang hinungdan sa linog, kansang epicenter nahimutang sa 37 kilometros sa habagatan-kasadpan sa dakbayan sa Surigao.